“በኢትዮጵያ እና ህንድ መካከል ያለውን ታሪካዊ ግንኙነት በተለያዩ ዘርፎች አጠናክሮ ማስቀጠል ይገባል“ ---- አፈ ጉባኤ ታገሰ ጫፎ

----------------------

(ዜና ፓርላማ) ታህሳስ 08፣ 2018 ዓ.ም፤ የኢትዮጵያ ፌዴራላዊ ዴሞክራሲያዊ ሪፐብሊክ 6ኛው የሕዝብ ተወካዮች እና የፌዴሬሽን ምክር ቤቶች 5ኛ ዓመት የስራ ዘመን የጋራ ስብሰባቸውን የህንድ ጠቅላይ ሚኒስትር ክቡር ናሬንድራ ሞዲ በተገኙበት አካሂደዋል፡፡

የህዝብ ተወካዮች ምክር ቤት አፈ ጉባኤ የተከበሩ አቶ ታገሰ ጫፎ በጋራ ስብሰባው መክፈቻ ላይ እንዳሉት፤ በኢትዮጵያ እና ህንድ መካከል ያለውን ታሪካዊ ግንኙነት በተለያዩ ዘርፎች አጠናክሮ ማስቀጠል እንደሚገባ ገልጸዋል፡፡

ኢትዮጵያ እና ህንድ ረጅም ዘመን ያስቆጠረ የትስስር ታሪክ እንዳላቸው አፈ ጉባኤው አስታውሰው፤ ግንኙነቱን ወደ ወሳኝ ምዕራፍ ማሳደግ እንደሚገባ ተናግረዋል፡፡

በኢትዮጵያ እና ሕንድ መካከል ያለው ግንኙነት በታሪክ፣ በባህል፣ በትምህርት፣ በንግድ እና በተለያዩ ዘርፎች የተሳሰረ መሆኑንም ተናግረዋል።

በኢትዮጵያ እና ህንድ መንግስታት መካከል ያለው የዲፕሎማሲያዊ ግንኙነት ወደ ሁለቱ ሀገራት የህዝብ ለህዝብ ግንኙነትና አጋርነት ማደግ እንዳለበትም አፈ ጉባኤው አንስተዋል፡፡

ጠቅላይ ሚኒስትር ናሬንድራ ሞዲ በኢትዮጵያ ያደረጉት ጉብኝትም ይህንን የሚያጠናክር እንደሆነ የተከበሩ አቶ ታገሰ ጠቅሰዋል።

(በ አበባው ዮሴፍ)

ተጨማሪ መረጃዎችን ለማግኘት፡-

በፌስቡክ http://www.facebook.com/hoprparliament

በዩቲዩብ

https://www.youtube.com/@FDREHOPR

በቴሌግራም

https://t.me/ParlamaNews

በትዊተር

http://twitter.com/fdrehopr

በዌብሳይት

www.hopr.gov.et ይከታተሉ።

“በኢትዮጵያ እና ሕንድ ዲፕሎማሲያዊ ግንኙነት አዲስ ምዕራፍ የተከፈተበት ወቅት ነው”

‎ ------ ጠቅላይ ሚኒስትር ናሬንድራ ሞዲ ------

(ዜና ፓርላማ) ታህሳስ 08 ፣ 2018 ዓ.ም፤ የሕንዱ ጠቅላይ ሚኒስትር ናሬንድራ ሞዲ፣ ዛሬ በሕዝብ ተወካዮች እና በፌዴሬሽን ምክር ቤት የጋራ ስብሰባ ላይ በመገኘት መልዕክት አስተላልፈዋል።

በመልዕክታቸው ሁለቱ የጥንታዊ ሥልጣኔ ባለቤት አገራት መካከል ያለው ግንኙነት ወደ ስትራቴጂክ አጋርነትና አዲስ ምዕራፍ የተሸጋገረበት ወቅት ላይ እንገኛለን ብለዋል።

ባለፉት ዓመታት ሁለቱ አገራት በኢኮኖሚያዊ፣ ማህበራዊና ዲፕሎማሲያዊ ዘርፎች ያላቸው ግንኙነት ማደጉን ጠቅላይ ሚኒስትሩ ገልጸዋል።

ሕንዳውያን ባለሀብቶች በጤና፣ በግብርና እና አምራች ዘርፎች ከ 5 ቢሊየን ዶላር በላይ ኢንቨስት በማድረግ ላይ እንደሚገኙም ተናግረዋል።

ሁለቱ አገራት በያሉበት አህጉር ተፅህኖ ፈጣሪ መሆናቸውን ገልጸው ለጋራ ተጠቃሚነትና ብልፅግና በስትራቴጂካዊ ትብብር በጋራ እንሰራለን ብለዋል።

ኢትዮጵያ የብሪክስ አባል ሀገር እንድትሆን ሕንድ ድጋፍ ማድረጓንም ጠቁመዋል።

በርካታ ኢትዮጵያዊያን በሕንድ የትምሀርት ዕድል አግኝተዋል ያሉት ጠቅላይ ሚኒስትሩ በአየር ንብረት ለውጥ በመከላከል፣ በጤና በግብርና፣ በኢኖቬሽንና ቴክኖሎጂ በጋራ ለመሥራት ዝግጁ ነን ብለዋል።

አዲስ ሐሳቦችን ለሚያፈልቁ የሥራ ፈጣሪ ወጣቶችና ተቋማትን መገንባትና ማበረታታት የኢትዮጵያን መጪ ዘመናት የሚቀይርና የሚወስን ነው ሲሉም ተናግረዋል።

በዚህ ታላቅ ምክር ቤት ውስጥ ሕጎቻችሁ ይወጣሉ፤ እዚህ ውስጥ የሕዝቡ መሻት የመንግሥት መሻት ይሆናል ያሉ ሲሆን በውይይትና ዲሞክራሲያዊ መንገድ የህግ የበላይነትን ማክበር ይገባል ሲሉ ተናግረዋል።

በጠቅላይ ሚኒስትር ዐቢይ አሕመድ (ዶ/ር) ለተደረገላቸው የክብር አቀባበልና ለተበረከተላቸው የኢትዮጵያ ታላቁ የክብር ኒሻን ጠቅላይ ሚኒስትር ናሬንድራ ሞዲ አመስግነዋል።

(በ በለጠ ሙሉጌታ)

ተጨማሪ መረጃዎችን ለማግኘት፡-

በፌስቡክ http://www.facebook.com/hoprparliament

በዩቲዩብ

https://www.youtube.com/@FDREHOPR

በቴሌግራም

https://t.me/ParlamaNews

በትዊተር

http://twitter.com/fdrehopr

በዌብሳይት

www.hopr.gov.et ይከታተሉ።

 

በሀገራዊ የልማት ፕሮጀክቶች የክዋኔ ኦዲት የተገኙ ክፍተቶች እንዲታረሙ ቋሚ ኮሚቴው አሳሰበ

-------------------------

(ዜና ፓርላማ) ታህሳስ 02፣ 2018 ዓ.ም.፤ በሕዝብ ተወካዮች ምክር ቤት የመንግስት ወጪ አስተዳደር እና ቁጥጥር ጉዳዮች ቋሚ ኮሚቴ ፕላን ልማት ሚኒስቴር በሀገራዊ የልማት ፕሮጀክቶች የክዋኔ ኦዲት የተገኙ ክፍተቶች እንዲታረሙ በትኩረት መስራት እንዳለበት አስገንዝቧል፡፡

ቋሚ ኮሚቴው በዋና ኦዲተር መስሪያ ቤት ፕሮጀክቶች የኦዲት ግኝትን መሰረት በማድረግ ከፕላን ልማት ሚኒስቴር ጋር  ውይይት አድርጓል።

ቋሚ ኮሚቴ ሰብሳቢ የተከበሩ የሺመቤት ደምሴ (ዶ/ር) ቋሚ ኮሚቴው በፌዴራል ዋና ኦዲተር የክዋኔ ኦዲት ግኝትን በግብአትነት በመጠቀም ክፍተቶችን በመለየት  ማስተካከያ እንዲደረግ ሲሉ  አሳስበዋል፡፡

የተከበሩ የሺመቤት ደምሴ (ዶ/ር)  አዋጁ በትኩረት ተገምግሞ የህግ ማዕቀፎች ሊሟሉለት እንደሚገባ አመላክተው፣ ለክዋኔ ኦዲቱ የድርጊት መርሀ-ግብር ሚኒስቴር መስሪያ ቤቱ ማዘጋጀት እንዳለበት አሳስበዋል።

የቋሚ ኮሚቴው ምክትል ሰብሳቢ የተከበሩ ወ/ሮ አራሬ ሞሲሳ በተዘረጋው አሰራር መሰረት ከኦዲት ግኝቱ በኋላ የተሰሩ ስራዎች በእቅድ ተይዘው መተግበር እንዳለባቸው ተናግረዋል።

በሌላ በኩል የፋይናሽያል እና የፊዚካል ሪፖርት የማያቀርቡ ፕሮጀክቶች፤ በተቀመጠላቸው ጊዜ እና በጀት ያልተጠናቀቁ  ፕሮጀክቶች ክትትል እና ቁጥጥሩ ተጠናክሮ እንዲቀጥል ሲሉ የቋሚ ኮሚቴው አባላት  አስገንዝበዋል፡፡

ቅንጅታዊ አሰራርን በሚመለከት የባለድርሻ አካላትን በማሰባሰብ ከቋሚ ኮሚቴው፣ ከፌደራል ዋና ኦዲተር መስሪያ ቤት፣ ከገንዘብ ሚኒስቴር እና  ከሌሎች ባለድርሻ አካላት ጋር በትብብር መስራት እንዳለባቸው  ተናግረዋል።

የፌዴራል ዋና ኦዲተር መስሪያ ቤት  ዋና ኦዲተር ክብርት ወ/ሮ መሰረት ዳምጤ የተሰሩ አበረታች ስራዎች እንዳሉ ሆነው የክዋኔ ኦዲት ግኝቱን በአዋጁ መሰረት እንደተመረመሩ ገልፀው ሚኒስቴር መስሪያ ቤቱ ከገንዘብ ሚኒስቴር ጋር በትብብር እንዲሰራ፤ ነባር እና አዲስ ፕሮጀክቶች ተለይተው እንዲቀመጡ መረጃዎች በዳታ ቤዝ መያዝ እንዳለባቸው አስገንዝበዋል፡፡

የተበላሹ አሰራሮችን ለማሻሻል ሪፎርም እየተተገበረ መሆኑን አንስተው የኦዲት ግኝቱን መሰረት በማድረግ ለመፈፀም ተግዳሮት የሆኑ ህጎችን ማሻሻል እንደሚቻል ጠቁመዋል።

በተጠናቀቁ ፕሮጀክቶች ላይ በጀት ሲመደብ የነበረበትን ምክንያት በሚመለከተው አካል ጥናትና ምርመራ ተደርጎ ተጠያቂነት እንዲሰፍን በማድረግ ሪፖርት እንዲያቀርብላቸው አሳስበዋል።

የአዋጭነት ጥናት ሳይጠና በጀት የተመደበላቸው ፕሮጀክቶችን ከአዋጁ በፊት ነው ወይስ በኋላ የሚለውን በመለየት መረጃ በማደራጀት በሪፖርት እንዲያቀርቡ ሰብሳቢዋ አሳስበዋል፡፡

የፕላንና ልማት ሚኒስቴር ሚኒስትር ክብርት ፍፁም አሰፋ (ዶ/ር) መንግስት ፕሮጀክቶች ላይ ያሉ ክፍተቶችን ለማረም በርካታ ስራዎች እየሰሩ መሆናቸውን ገልጸው፤ ህግና ሥራዓትን አክብረው በማይሰሩ ተቋማት ላይ ተጠያቂነት እንዲረጋገጥ የባለድርሻ አካላት ተሳትፎ መኖር እንዳለበት አስረድተዋል፡፡

ከአዋጁ በፊትና በኋላ ያሉ የክዋኔ ኦዲት ክፍተቶችን የፌዴራል ዋና ኦዲተር እና ቋሚ ኮሚቴው እገዛ በማድረግ በአዋጁ ላይ ያሉትን ባለድርሻ አካላት በጋራ በመገምገም ችግሩን ለመፍታት አጋዥ እንደሆናቸው አስተያየት ሰጥተዋል።

(በ የትናየት አሊ)

(ዜና ፓርላማ) ሰኔ 05 ፣ 2017 ዓ.ም.፤ አዲስ አበባ፤ የሕዝብ ተወካዮች ምክር ቤት አቶ ተስፋዬ ንዋይን የኢትዮጵያ ብሔራዊ ምርጫ ቦርድ ምክትል ሰብሳቢ አድርጎ ሾሟል፡፡ በክቡር ጠቅላይ ሚኒስትር ዐቢይ አህመድ ( ዶ/ር) የቀረበውን የዕጩዎች ሹመት ውሳኔ ሃሳብ የመንግሰት ዋና ተጠሪ ሚኒስትር የተከበሩ ተስፋዬ በልጅጌ ( ዶ/ር) ያቀረቡ ሲሆን፣ የምርጫ ሂደቱ ብዝሃነትን ያማከለ እና የማንኛውም ፖለቲካ ፓርቲ አባል ያልሆኑ መሆናቸውን አብራርተዋል፡፡ በተጨማሪም ምክር ቤቱ አቶ ተክሊት ይመስል እና ወ/ሮ ነሲም አሊን የቦርዱ አመራሮች እንዲሆኑ ሾሟል፡፡ ተሿሚዎቹ በምክር ቤቱ ፊት ቀርበው ቃለ-መሃላ የፈጸሙ ሲሆን፣ ምክር ቤቱ ሹመቱን በሁለት ድምጸ- ተዓቅቦ እና በአብላጫ ድምጽ አጽድቆታል፡፡

(ዜና ፓርላማ) ግንቦት 28፣ 2017 ዓ.ም፤ የኢትዮጵያን ብሔራዊ ጥቅም ለማስጠበቅ ከጎረቤት ሀገራት ብቻ ሳይሆን ከተለያዩ ቀጠናዊ ኃይሎች ጋር በጋራ እንደሚሰራ የውጭ ጉዳይ ሚኒስትሩ ጌዲዮን ጢሞቲዎስ (ዶ/ር) ተናገሩ፡፡ ዛሬ በተካሄደው የሕዝብ ተወካዮች ም/ቤት 4ኛ ዓመት የስራ ዘመን 34ኛ መደበኛ ስብሰባ፤ የውጭ ጉዳይ ሚኒስትር ጌዲዮን ጢሞቲዎስ (ዶ/ር) ከምክር ቤቱ አባላት ለቀረቡላቸው ጥያቄዎች ምላሽና ማብራሪያ ሰጥተዋል፡፡ የምክር ቤቱ አባላት የተለያዩ ጥያቄዎች ላይ ማብራሪያ የጠየቁ ሲሆን፤ ኤርትራን ጨምሮ ከተለያዩ የጎረቤት ሀገራት ጋር ያለው ግንኙነት፣ በውጭ ሀገራት የሚኖሩ ኢትዮጵያዊያንን መብት ለማስጠበቅና ከተለያዩ አደጋዎች ለመታደግ የሚደረገው ጥረት፣ በድንበር አከባቢ የሚሰፍሩ የጎረቤት ሀገራት ህዝቦች እና በውጭ ኃይሎች የተያዙ የኢትዮጵያ ግዛቶችን በሚመለከት የተነሱት ዋና ዋናዎቹ ናቸው፡፡ የውጭ ጉዳይ ሚኒስትሩ ጌዲዮን ጢሞቲዎስ (ዶ/ር) ኢትዮጳያ ለጎረቤት ሀገራት ቅድሚያ የመስጠት ዲፕሎማሲያዊ መርህ እንዳላት ጠቁመው፤ ይሁን እንጂ የኢትዮጵያን ብሔራዊ ጥቅም ለማስጠበቅ ከተለዩ ቀጠናዊ ኃይሎች ጋር የሚሰራው ስራም ተጠናክሮ እንደሚቀጥል አብራርተዋል፡፡ ኢትዮጵያ በአፍሪካ ቀንድ ሰላምና መረጋጋት እንዲረጋገጥ ለቀጣናው ኢኮኖሚ ትስስር መጠናከር ወሳኝ ሚና የምትጫወት ሀገር ስለመሆኗ በተለያዩ አለም አቀፍ መድረኮች እየተረጋገጠ ስለመሆኑም አንስተዋል፡፡ በአሁኑ ወቅት የኢትዮጵያ መንግስት ከኤርትራ ጋር የቃላት ጦርነት ውስጥ አለመግባቱንና የባህር በር ጥያቄን ለማሳካት የተጀመረው ዲፕሎማሲያዊ አካሄድ እውን እስኪሆን ድረስ በዓለም አቀፍ ህጎች እና በሰጥቶ መቀበል መርህ መስራት እንደሚገባም አመላክተዋል። በኢትዮጵያ እና በኤርትራ መካከል ያለው ህዝብ ለህዝብ ግንኙነት ከመንግስታት ግንኙነት የላቀ ትርጉም ያለው በመሆኑ በቀጣይም ተጠናክሮ እንደሚቀጥል ጌዲዮን (ዶ/ር) አንስተዋል፡፡ በሌላ በኩል በህገ ወጥ መንገድ ከሀገር የሚወጡ ዜጎችን ወደ ሀገር ቤት በመመለስ፣ በህጋዊ መንገድ በውጭ ሀገራት የሚሰሩ ዜጎችን መብት በማስጠበቅ እየተሰሩ ያሉት ስራዎች ተጠናክረው እንደሚቀጥሉ የውጭ ጉዳይ ሚኒስትሩ ገልጸው፤ ነገር ግን በህገ ወጥ መንገድ ከሀገር የመውጣቱ ጉዳይ አሁንም ፈታኝ እንደሆነባቸው አስረድተዋል፡፡