የኢትዮጵያ ፌደራላዊ ዴሞክራሲያዊ ሪፐብሊክ የሕዝብ ተወካዮች ምክር ቤት አፈ-ጉባኤ

የተከበሩ አቶ ታገሠ ጫፎ

መልዕክት

በዴሞክራሲ ማሕበረሰብ ፓርላማ የፖለቲካ ተሳትፎ መገላጫ ነው፡፡ የፓርላማ ዴሞክራሲ ሥርዓት በአንድ አገር መጠናከር ለዜጎች የዴሞክራሲ ተሳትፎ መጎልበት፣ ለሕግ የበላይነትና ለማህበራዊ ፍትሕ መረጋገጥ ወሳኝ ሲሆን አስፈፃሚው የመንግሥት አካል በተጠያቂነትና በግልፅነት ስራውን እንዲያከናወን ያስችላል፡፡ በሀገራችን የፓርላማ ዴሞክራሲ ስርዓት መተግበር ከጀመረ ሦስት አስርት ዓመታት የተቆጠሩ ሲሆን አምስት የምክር ቤት ዘመናት አልፈው እነሆ አሁን በ6ኛው ምክር ቤት 4ኛ ዓመት የሥራ ዘመን ላይ እንገኛለን፡፡ የኢፌዲሪ የሕዝብ ተወካዮች ምክር ቤት የፌደራሉ መንግሥት ከፍተኛ የሥልጣን አካል ነው፡፡ በየአምስት ዓመቱ በሚካሄድ ብሔራዊ ምርጫ የሕዝብ ይሁንታ አግኝተው በሚመረጡ አባላት ይመሰረታል፡፡ አባላቱም ሁሉ አቀፍ፣ ነፃ፣ ቀጥተኛ፣ ትክክለኛ በሆነና ድምጽ በሚስጥር በሚሰጥበት ሥርዓት በሕዝብ ይመረጣሉ፡፡አባላቱ ተጠሪነታቸው ለኢትዮጵያ ሕዝብ ነው፤ ተገዥነታቸውም ለሕገ መንግሥቱ፣ ለሕዝቡና ለሕሊናቸው ነው፡፡ ምክር ቤቱ በሕግ አወጣጥ፣ በክትትልና ቁጥጥር እንዲሁም በውክልና ሥራዎች የሚያከናውናቸው ተግባራት እና የሚያስተላልፋቸው ውሳኔዎች ወሳኝ መሆናቸው ይታወቃል፤ በቀጥታም ሆነ በተዘዋዋሪ በእያንዳንዱ ዜጋ ሕይወት ላይ በአወንታዊም ሆነ በአሉታዊ ተፅዕኖ ማሳደራቸው ግልፅ ነው፡፡ በመሆኑም ምክር ቤቱ ለሀገር ሠላም፣ ለዜጎች ማህበራዊ ልማትና ሁለንተናዊ ብልፅግና መረጋገጥ አስፈላጊ ናቸው ተብለው በታመኑ ጉዳዮች ላይ በሕግ አወጣጥ ሂደት፣ በክትትልና ቁጥጥር እና በውክልና ተግባራት ተገቢውን ምርመራ በማካሂድ በርካታ ሀገራዊ ውሳኔዎችን ሲያሳልፍ ቆይቷል፡፡ ለሀገራዊ እቅዶች፣ፕሮግራሞች፣ፖሊሲዎችና ፕሮጀክቶች መፈፀም ፤ የመንግሥትና ሕዝብ ሃብትና ንብረት ለታለመለት ዓላማ ውለው የሕዝብ የኑሮ ደረጃ እንዲሻሻል የመንግሥት ተቋማት ተልዕኳቸውን በአግባቡ እንዲወጡ ምክር ቤቱ ጠንከራ የክትትልና ቁጥጥር ስራ ሰርቷል፤ እየሰራም ይገኛል፡፡ ህብረተሰቡ የሚያነሳቸው የልማትና የመልካም አስተዳደር ጥያቄዎች ምላሽ እንዲያገኙ ምክር ቤቱ ከመቼውም ጊዜ በላይ ትኩረት ሰጥቶ እየሰራ ሲሆን የተቋማት ምላሽም እያደገና እየተሻሻለ መጥቷል ማለት ይቻላል፡፡ በፓርላማ ዲፕሎማሲው ዘርፍ የሀገራችንን ባሕልና እውነተኛ ገፅታ ለማስተዋወቅና የሀገሪቱን የኢኮኖሚ ዲፕሎማሲ (ንግድና ኢንቨስትመንት) ከመደገፍ ረገድ አበረታች ውጤቶች ለማስመዝገብ የሁለትዮሽና በብዙኽዮሽ መድረኮችን በአግባቡ ለመጠቀም ጥረት ተደርጓል፤ በቀጣይም የፓርላማ ዲፕሎማሲን እንደ አንድ የውጭ ፖሊሲ መሳሪያ በስፋትና በተጠናከረ አግባብ ተግባራዊ ለማድረግ ምክር ቤቱ በትኩረት የሚሰራ ይሆናል፡፡ የዜጎችን የኑሮ ደረጃ ለማሻሻል የተጓተቱ ፕሮጀክቶች ፈጥነው ተጠናቀው ለህብረተሰቡ የልማት አገልግሎት እንዲሰጡ፣ኢንቨስትመንት እንዲስፋፋ፣በሥራ ፈጠራና ድህነት ቅነሳ፣ ለሕግ የበላይነትና ለመልካም አስተዳደር መረጋገጥ ምክር ቤቱ በቀጣይ ጊዜያት በትኩረት የሚሰራ ይሆናል፡፡ ያሉብንን የፖለቲካ ልዩነቶች በንግግር፣ በምክክርና በውይይት ለመፍታት ምክር ቤቱ የአቋቋመው ሀገራዊ የምክክር ኮሚሽን በአሁኑ ወቅት በተለያዩ የሀገሪቱ ክፍሎች በአጀንዳ ማሰባሰብ ሂደት ላይ ይገኛል፡፡ ለኮሚሽኑ ተልዕኮ መሳካት ሁላችንም ሀገር ወዳድ ኢትዮጵያዊያንና ትውልደ ኢትዮጵያዊያን በሀገራዊ የፍቅር ስሜት የበኩላችን ድርሻ ልንወጣ ይገባል፡፡ የአንድነታችን ተምሳሌትና የአብሮነታችን ማሳያ የሆነው ታላቁ የኢትዮጵያ ሕዳሴ ግድባችን በመጠናቀቅ ሂደት ላይ የሚገኝ ሲሆን የዜጎችን ማህበራዊ ኢኮኖሚ ልማት የሚያፋጥኑ በርካታ ትላልቅ ሀገራዊ ፕሮጀክቶች እየተከናወኑ ይገኛሉ፡፡ ሥለሆነም ሀገራችን የጀመረችውን ሁለንተናዊ ብልፅግና ጉዞ ከዳር ለማድረስና ለዜጎቿ ምቹ የሆነች ኢትዮጵያን እውን ለማድረግ ኢትዮጵያዊያንና ትውልደ ኢትዮጵያዊያን ለሠላም፣ ለአብሮነታችን መጎልበትና ለብሔራዊ መግባባት አብረን እንድንቆምና ሁላችንም የየራሳችንን አበርክቶ እንድንወጣ በዚህ አጋጣሚ መልዕክት አስተላልፋለሁ፡፡ አዲሱ ዓመት የሠላም፣ የደስታ፣ የአብሮነት፣ የመግባባት፣ የልማት እና ብዙ ተስፋዎች የምናይበት ዘመን እንዲሆን ልባዊ ምኞቴ ነው፡፡ አመሠግናለሁ!

የፌዴራል የስፖርት ልማት እና አስተዳደር አዋጅ በሙሉ ድምፅ ጸደቀ

*********************

የሕዝብ ተወካዮች ምክር ቤት ዛሬ ባካሄደው 15ኛ መደበኛ ስብሰባ፣ የስፖርት ዘርፍ ላይ መሠረታዊ ለውጥ ያመጣል ተብሎ የታመነበትን የፌዴራል የስፖርት ልማት እና አስተዳደር ረቂቅ አዋጅ መርምሮ አጽድቋል።

አዲሱ አዋጅ ቁጥር 1413/2018 በስፖርቱ ዘርፍ አካታች፣ ዘመናዊና ግልጽነት ያለው የአሰራር ሥርዓት ለመዘርጋት ምቹ መደላድል የሚፈጥር ሲሆን፣ በዘርፉ የሚታዩ የአሰራርና የመልካም አስተዳደር ችግሮችን በዘላቂነት ለመፍታት ታላቅ ፋይዳ እንዳለው ተገልጿል።

አዋጁ የስፖርት መሠረተ ልማቶችንና ማሰልጠኛ ተቋማትን ከማስፋፋት ባለፈ፣ የስፖርት ግብዓት አምራቾች እንዲበረታቱና ዘርፉ ለሀገር ኢኮኖሚ የራሱን ድርሻ እንዲያበረክት ያደርጋል።

በተጨማሪም ማህበራዊ ትስስርን በማጎልበት፣ ዲፕሎማሲያዊ ግንኙነትን በማጠናከር እና ስፖርት ነክ ወንጀሎችን በመከላከል ረገድ ጉልህ ሚና እንደሚጫወት በምክር ቤቱ የጤና፣ ማህበራዊ ልማት፣ ባህልና ስፖርት ጉዳዮች ቋሚ ኮሚቴ ሰብሳቢ ወርቀሰሙ ማሞ አብራርተዋል።

የባህልና ስፖርት ሚኒስትር ወ/ሮ ሸዊት ሻንካ በሰጡት ማብራሪያ፣ ስፖርት የኢትዮጵያውያን የኩራት ምንጭ እንዲሆን ዘርፉን የያዙ ማነቆዎችን በአሰራርና በስርዓት መፍታት የግድ እንደሚል ጠቁመዋል።

አዋጁ ከዘርፉ ማግኘት ያለባትን ጥቅም እንድታገኝ በማድረግ ረገድ መሠረታዊ ለውጥ እንደሚያመጣ ሚኒስትሯ ገልጸዋል።

የምክር ቤቱ አባላትም የአዋጁን አስፈላጊነት በማመንና አፈጻጸሙ ላይ ትኩረት እንዲደረግ በማሳሰብ አዋጁን በሙሉ ድምፅ ማጽደቁን ከሕዝብ ተወካዮች ምክር ቤት የተገኘው መረጃ ያመለክታል።

ተጨማሪ ለማንበብ...

የሴኩዩሪቲ አገልግሎት ክፍያ አካትቶ የተሻሻለው የኢትዮጵያ አቭየሽን ሴኩሪቲ አዋጅ ፀደቀ።

ሚያዝያ 13/ 2018

የሴኩዩሪቲ አገልግሎት ክፍያ አካትቶ የተሻሻለው የኢትዮጵያ አቭየሽን ሴኩሪቲ አዋጅ ፀደቀ።

የህዝብ እንደራሴዎች ምክር ቤት ዛሬ ባካሄደው መደበኛ ስብሰባው የኢትዮጵያ አየር መንገድ ለሚሰጠው የአቭየሽን አገልግሎት ከተገልጋዮች ክፍያ መስብሰብ የሚያስችለውን አዋጅ በአብላጫ ድምፅ አፅድቋል።

በአየር ትራንስፖርት ስርዓቱ የሚቃጡ የሕገ ወጥ ጣልቃ ገብ ድርጊቶች፣ ባህሪያትና የአፈፃፀም ስልት ከጊዜ ወደ ጊዜ እያደገና እየተወሳሰበ በመምጣቱ፤ ነባሩ አዋጅ ከሃያ ዓመታት በላይ ሳይሻሻል የቆየ በመሆኑ፤ ዘመን ያመጣቸውን ውስብስብ ህገ ወጥ ጣልቃ ገብ ድርጊቶችን ለመቆጣጠር የሚያስችል እንዲሁም ወቅቱን የዋጀ የህግ ማዕቀፍ መደንገግ የሚያስፈልግ በመሆኑ አዋጁን ማሻሻል እንዳስፈለገ ተነግሯል።

የኢትዮጵያ አየር መንገድ ግሩፕ የዓለም አቀፍ ሲቪል አቭዬሽን ድርጅት ከራሱ መንገደኞች፣ ከሌሎች ኦፕሬተሮች እና በኤርፖርት ውስጥ የአቪዬሽን ሴኪዩሪቲ አገልግሎት ከሚያገኙ ማናቸውም አካላት የአገልግሎት ክፍያ በመሰብሰብ ለብሔራዊ መረጃና ደህንነት አገልግሎት ገቢ እንዲያደርግ በአዋጁ ተደንግጓል።

ከአገልግሎት ክፍያ የሚሰበሰበው ገቢ ለኤርፖርት የሴኩዩሪቲ ቴክኖሎጂ ግዢ፣ ለአቭዬሽን ሴኩዩሪቲ የፀጥታ አካላት ሥልጠናና አቅም ግንባታ፣ ለአነፍናፊ ውሻ ግዥና ሥልጠና፣ ለጥገናና ማስፋፊያ እንዲሁም አሠራርን ለማዘመን የሚውል መሆኑም በአዋጁ ተካትቷል።

ምንታምር ፀጋው

ተጨማሪ ለማንበብ...

ምክር ቤቱ የባለብዙ ተዋንያን የግብርና ኤክስቴንሽን አገልግሎትና አስተዳደር ረቂቅ አዋጅን መርምሮ አፀደቀ

----------------------

(ዜና ፓርላማ) መጋቢት 29 ፣ 2018 ዓ.ም፤ የሕዝብ ተወካዮች ምክር ቤት በ14ኛ መደበኛ ስብሰባው የባለብዙ ተዋንያን የግብርና ኤክስቴንሽን አገልግሎትና አስተዳደር ረቂቅ አዋጅን መርምሮ አጽድቋል፡፡

በሕዝብ ተወካዮች ምክር ቤት የግብርና ጉዳዮች ቋሚ ኮሚቴ ሰብሳቢ የተከበሩ አቶ ሰለሞን ላሌ ሪፖርት እና የውሳኔ ሀሳብ አቅርበዋል፡፡

ረቂቅ አዋጁ በመንግስት ብቻ የሚሰጠው የግብርና ኤክስቴንሽን አገልግሎት በቂ ባለመሆኑ ወቅቱ የሚጠይቀውን የባለብዙ ተዋንያን የግብርና ኤክስቴንሽን አገልግሎት ሥርዓት እንዲዘረጋ ምቹ መደላድል እንደሚፈጥር ሰብሳቢው አመላክተዋል፡፡

በዲጂታል ግብርና ኤክስቴንሽን የሚያማክሩ እና የመረጃ ቅብብሎሽ አገልግሎት የሚሰጡ የግል ባለሀብቶች ፣መንግስታዊ ያልሆኑ እና የሆኑ ድርጅቶች እየታዩ በመሆኑ በግብርና ኤክስቴንሽን ውስጥ አገልግሎት እንዲሰጡ የሚያስችል ረቂቅ አዋጅ መሆኑን የተከበሩ አቶ ሰለሞን ላሌ አያይዘው አስገንዝበዋል፡፡

የግብርና ኤክስቴንሽን አገልግሎት አሰጣጡ ጥራትና ፍትሃዊነት ቁጥጥር ትኩረት የሚሻ በመሆኑ አገልግሎት የሚሰጠው በተመዘገበና የብቃት ማረጋገጫ ባገኘ አገልግሎት አቅራቢ መሆን እንደሚኖርበት አዋጁ የአሰራር ሥርዓት እንዳስቀመጠ ጠቁመዋል፡፡

የግብርና ኤክስቴንሽን መሰረት ልማት ዝርጋታዎችን ማዘመን በመንግስት ላይ ብቻ በመውደቁ በሚጠበቀው ደረጃ እርካታ ያልተገኘበትን የተጠቃሚዎች ፍላጎት ምላሽ ለመስጠት የግብርና ኤክስቴንሽን ፈንድ ለማቋቋምና ፍላጎት ለመቅረፍ ረቂቅ አዋጁ እንዳካተተ ሰብሳቢው አንስተዋል፡፡

በግብርና ባለሙያዎች ብቻ ይሰጥ የነበረው የግብርና ኤክስቴንሽን አገልግሎት አሁን ላይ የምርት መጠንና ምርታማነትን ለማሳደግ በቂ ምላሽ ባለመስጠቱ ይህንን ችግር ለመፍታት አዳዲስ ቴክኖሎጂዎችን በመጠቀም የግብርና ኤክስቴንሽን አገልግሎቱን ለማሻሻልና ለማዘመን ረቂቅ አዋጁ አስፈላጊ ነው ብለዋል፡፡

የሀገራችን ኢኮኖሚ በግብርና ላይ የተመሰረተ መሆኑን የጠቀሱት አቶ ሰለሞን ላሌ፣ በዘርፉ ምርትን በብዛት፣ በጥራትና በቀጣይነት ለማሳደግ የግብርና ኤክስቴንሽን ከፍተኛ ሚና እንዳለው ገልጸዋል፡፡

የምክር ቤት አባላት በበኩላቸው፣ ከግብርና ምርምር የሚገኙና ከውጭ የሚመጡ ቴክኖሎጂዎችን የግብርና ባለሙያው ለአርሶ አደሮች በተግባር ማሳ ላይ እያሳዩና እያስተማሩ አገልግሎት መስጠት እንዳለባቸው አስተያየት ሰጥተዋል፡፡

የምክር ቤት አባላቱ አያይዘውም የግብርና ኤክስቴንሽን ተደራሽነት ከ36% በላይ አለማለፉን ጠቁመው፣ ረቂቅ አዋጁ ይህንን ክፍተት እንደሚሞላ ገልጸዋል፡፡

ረቂቅ አዋጁ መንግስታዊ ያልሆኑ የአገልግሎት ተዋንያን ህጋዊነትን በጠበቀ መልኩ፣ ተጠያቂነት በሰፈነበት እና ጥራቱ በጠበቀ ሁኔታ መንግስትን እና አርሶ አደሩን በመደገፍ የግብርና ልማቱን በሚገባ እንደሚያሳልጥ ጠቁመዋል።

በመጨረሻም ምክር ቤቱ በረቂቅ አዋጁ ላይ ሰፊ ውይይት ካደረገ በኋላ፣ የባለብዙ ተዋንያን የግብርና ኤክስቴንሽን አገልግሎትና አስተዳደር ረቂቅ አዋጅን፣ አዋጅ ቁጥር 1411/2018 ሆኖ በሙሉ ድምጽ አጽድቆታል፡፡

(በ አገሪቱ ጌቴ)

ተጨማሪ መረጃዎችን ለማግኘት፡-

በፌስቡክ http://www.facebook.com/hoprparliament

በዩቲዩብ

https://www.youtube.com/@FDREHOPR

በቴሌግራም

https://t.me/ParlamaNews

በትዊተር

http://twitter.com/fdrehopr

በዌብሳይት

www.hopr.gov.et ይከታተሉ።

ተጨማሪ ለማንበብ...

ቋሚ ኮሚቴው የመንግስት ፕሮጀክቶች ክትትልና ቁጥጥር ስርዓት አፈፃፀም ላይ የተወሰደን የእርምት እርምጃ ሪፖርትን እያዳመጠ ይገኛል

ቋሚ ኮሚቴው የመንግስት ፕሮጀክቶች ክትትልና ቁጥጥር ስርዓት አፈፃፀም ላይ የተወሰደን የእርምት እርምጃ ሪፖርትን እያዳመጠ ይገኛል

‎---------------------

‎(ዜና ፓርላማ) መጋቢት 28፣ 2018 ዓ.ም፤ አዲስ አበባ ፤ በሕዝብ ተወካዮች ምክር ቤት የመንግስት ወጪ አስተዳደርና ቁጥጥር ጉዳዮች ቋሚ ኮሚቴ የመንግስት ፕሮጀክቶች ክትትልና ቁጥጥር ስርዓት አፈፃፀም ላይ በተሰራ የ2016/17 ክዋኔ ኦዲት ግኝት መሠረት በማድረግ የተወሰዱ የእርምት እርምጃ ሪፖርት እያዳመጠ ነው።