የተከበሩ ወ/ሮ እመቤት ወንድሙ ኡሻቾ

የተከበሩ ወይዘሮ እመቤት ወንዲሙ ኡሻቾ ወይዘሮ እመቤት ነሐሴ 11 ቀን 1981 ዓ.ም ከአባታቸው ከአቶ ወንድሙ ኡሻቾ እና ከእናታቸው ከወይዘሮ አልማዝ ወዳጆ በወላይታ ዞን ዲምቱ ከተማ አስተዳደር ተወለዱ። ባለትዳርና የ3 ልጆች እናት ሲሆኑ፣ የአማርኛ፣ የወላይትኛ እና የእንግሊዝኛ ቋንቋዎችን በብቃት ይናገራሉ። ወይዘሮ እመቤት የትምህርት ህይወታቸውን በፅናትና በትጋት ያከናወኑ ሲሆን የትምህርት ደረጃቸውም የሚከተለው ነዉ:- * አንደኛ ደረጃ ትምህርት፡ እድሜያቸው ለትምህርት ሲደርስ በቢላቴን ጤና ሙሉ አንደኛ ደረጃ ትምህርት ቤት በመግባት ከ1ኛ እስከ 8ኛ ክፍል ተማሩ። * ሁለተኛ ደረጃ ትምህርት፡ በአካባቢው የሁለተኛ ደረጃ ትምህርት ቤት ባለመኖሩ ምክንያት ከዲምቱ በ30 ኪ.ሜ ርቀት ላይ ወደሚገኝ በዴሳ ከተማ አስተዳደር በመመላለስ ከ9ኛ እስከ 12ኛ ክፍል ትምህርታቸውን አጠናቀቁ። * የመጀመሪያ ዲግሪ (BA Degree)፡ በ2002 ዓ.ም ወደ ዲላ ዩኒቨርሲቲ በመግባት በልዩ ፍላጎት ትምህርት (Special Needs Education) ሰኔ 30 ቀን 2004 ዓ.ም ተመረቁ። * ሁለተኛ ዲግሪ (MA Degree)፡ በሰው ሀብት አመራር (Master of Business Administration in Human Resource Management) ከሀዋሳ ዩኒቨርሲቲ በሐምሌ 2013 ዓ.ም ሁለተኛ ዲግሪያቸውን አግኝተዋል። ወይዘሮ እመቤት ከተመረቁበት ጊዜ ጀምሮ በተለያዩ ደረጃዎች ህዝብና መንግስትን በትጋት አገልግለዋል፦ * በድጉና ፋንጎ ወረዳ (ከመጋቢት 7 ቀን 2005 ዓ.ም ጀምሮ)፡ የሴቶችና ህፃናት ጽሕፈት ቤት ምክትል ኃላፊና የሴቶች አማካሪ በመሆን ለ3 ዓመታት ያህል የሴቶችና ህፃናትን ደህንነት ለማስፋፋት አገልግለዋል። * በወላይታ ሶዶ ከተማ (ከሰኔ 2008 ዓ.ም ጀምሮ)፡ የሴቶች አቅም ማጎልበት ከፍተኛ ባለሙያ በመሆን የሴቶችን የኢኮኖሚ፣ የማህበራዊና ፖለቲካዊ ተሳታፊነት ለማሳደግ ለሁለት ዓመታት ያህል አገልግለዋል። ባሳዩት አፈጻጸም መነሻነት የሶዶ ከተማ የሴቶች ሊግ (ክንፍ) ኃላፊ ሆነው ተሰየሙ። * በወላይታ ዞን ደረጃ፡ በከተማው ባስመዘገቡት ውጤት እውቅና አግኝተው ወደ ዞን ደረጃ በማደግ የዞኑ ሴቶችና ህፃናት መምሪያ ምክትል ኃላፊና የሴቶች አማካሪ ሆነው ሰርተዋል። * የሠራተኛና ማህበራዊ ጉዳዮች መምሪያ ኃላፊነት (2013 ዓ.ም)፡ በዞኑ ባካበቱት ልምድና ቁርጠኝነት የወላይታ ዞን ሠራተኛና ማህበራዊ ጉዳዮች መምሪያ ኃላፊ ሆነው ለ1 ዓመት አገልግለዋል። * የባህል፣ ቱሪዝም እና ትምህርት መምሪያዎች ፡ በወላይታ ዞን ባህልና ቱሪዝም መምሪያ የልማት ዕቅድ ቡድን መሪ በመሆን የተሳካ ስራዎችን ያከናወኑ ሲሆን፣ በመቀጠልም ከመጀመሪያ ዲግሪያቸው ጋር በተያያዘ የትምህርት ጥራት ክትትልና የልዩ ፍላጎት ስራዎችን በትምህርት መምሪያ ውስጥ ሰርተዋል። * የክልል ምክር ቤት አባልነትና የቋሚ ኮሚቴ ሰብሳቢነት (ከ2013 - 2018 ዓ.ም)፡ በ6ኛው ዙር ሀገራዊ ምርጫ የድጉና ፋንጎ ወረዳ ህዝብን (ዳሞት ወይዴ 2 ምርጫ ክልል) በመወከል የደቡብ ኢትዮጵያ ክልል ምክር ቤት አባል እና በግብርናና ገጠር ልማት ቋሚ ኮሚቴ በተመላላሽ አባልነት አገልግለዋል። በመቀጠልም የደቡብ ኢትዮጵያ ክልል ምክር ቤት የማህበራዊ ዘርፍ ቋሚ ኮሚቴ ሰብሳቢ በመሆን ህግጋትን በመመርመርና የቁጥጥር ስራዎችን በመምራት አገልግለዋል። * የህዝብ ተወካዮች ምክር ቤት አባልነት፡ በ7ተኛው ዙር ምርጫ የድጉና ፋንጎ ወረዳ እና የዲምቱ ከተማ ህዝብን በመወከል በከፍተኛ የአብላጫ ድምፅ ተመርጠው የህዝብ ተወካዮች ምክር ቤት አባል በመሆን አገራቸውን በማገልገል ላይ ይገኛሉ። ወይዘሮ እመቤት ወንዲሙ በህዝብ ተወካይነት፣ በህግ ቀረጻ፣ በሴቶችና ህፃናት ማህበራዊ ማብቃት፣ በሰው ሀብት አመራር እንዲሁም በክልልና በሀገራዊ ህግ አውጪነት ዘርፍ የጎላ አስተዋጽኦ ያበረከቱ ታታሪና ውጤታማ መሪ ናቸው። ወይዘሮ እመቤት ወንዲሙ አዳዲስ ነገሮችን የመማር ከፍተኛ ፍላጎት ያላቸው፣ ከዘመናዊ ቴክኖሎጂዎች ጋር ቶሎ የመላመድ አቅም ያላቸው፣ ህዝብና ሀገርን በታማኝነት የሚያገለግሉ፣ ውጤታማና ታታሪ መሪ ናቸው።