የተከበሩ አቶ. ጋሻው መርሻ ይማም

ስሜ ጋሻው መርሻ ይባላል። በ1985 ዓ.ም. ከአባቴ መርሻ ይማም እና ከእናቴ ትሁን ተስፋ በአማራ ክልል፣ በደቡብ ጎንደር ዞን፣ እስቴ ወረዳ ተወለድኩ። ያደግሁት በገጠር አካባቢ ሲሆን፣ በልጅነቴ የቤተሰቤን ኑሮ ለመደገፍ ከብትና በጎችን በመጠበቅ እንዲሁም በተለያዩ የእርሻ ሥራዎች በመሳተፍ አግዤያለሁ። በሰባት ዓመቴ በበልታ አንደኛ ደረጃ ትምህርት ቤት መደበኛ ትምህርቴን ጀመርኩ። የአንደኛ ደረጃ ትምህርቴን ካጠናቀቅኩ በኋላ በመካነ ኢየሱስ ሁለተኛ ደረጃ ትምህርት ቤት ተማርኩ። ከዚያም የመሰናዶ ትምህርቴን በደብረታቦር አፄ ቴዎድሮስ ሁለተኛ ደረጃ ትምህርት ቤት ተከታተልኩ። ከዚያ በኋላ በአዲስ አበባ ዩኒቨርሲቲ፣ የንግድ ስራ ትምህርት ቤት በመግባት የመጀመሪያ ዲግሪዬን አጠናቀቅሁ። በመቀጠልም ከደብረ ብርሃን ዩኒቨርሲቲ የማስተርስ ዲግሪዬን አገኘሁ። በሙያዊ ሕይወቴ ውስጥ በተለያዩ የመንግሥት ተቋማት የተለያዩ ኃላፊነቶችንና የሥራ መደቦችን በመያዝ ሰፊ የሕዝብ አስተዳደርና የአመራር ልምድ አካብቻለሁ። ከግንቦት 2015 ዓ.ም ጀምሮ በኢትዮጵያ ፖስታ አገልግሎት ድርጅት የምክትል ዋና ሥራ አስፈጻሚነት ኃላፊነት እየተወጣሁ እገኛለሁ። በተጨማሪም በአማራ ብሔራዊ ንቅናቄ የፖለቲካ ፓርቲ አመራር ውስጥ በመሳተፍ ለፓርቲው አመራርና አስተዳደር አስተዋጽኦ እያደረግሁ እገኛለሁ። ከገጠር አካባቢ በመነሳት በቤተሰቤ የእርሻ ሥራዎች ውስጥ ከመሳተፍ ጀምሮ ከፍተኛ ትምህርትን በመከታተልና በሕዝብ ተቋማት የአመራር ኃላፊነቶችን በመወጣት ያሳለፍኩት የሕይወት ጉዞ ለሙያዊ እድገት፣ ለሕዝብ አገልግሎትና ለድርጅታዊ አመራር ያለኝን ቁርጠኝነት ቀርጾታል። ጋሻው መርሻ ይማም