"በኢትየጰያ አንፃራዊ ሰላም ተረጋግጧል" ----- ጠቅላይ ሚኒስትር ዐቢይ አህመድ (ዶ/ር)

-------------

(ዜናፓርላማ) ሰኔ 30 ፣ 2018 ዓ.ም፤ በኢትዮጵያ አንጻራዊ ሰላም መረጋገጡን የኢፌዴሪ ጠቅላይ ሚኒስትር ዶክተር ዐብይ አህመድ ገለጹ፡፡

ጠቅላይ ሚኒስትሩ ይንን የገለጹት የህዝብ ተወካዮች ምክር ቤት ዛሬ ባካሔደው 30ኛ መደበኛ ስብሰባ ላይ ተገኝተው የመንግስትን የ2018 በጀት ዓመት አፈጻጸም አስመልልቶ ከምክር ቤት አባላት ለተነሱላቸው ጥያቄዎች ምላሽና ማብራሪያ በሰጡበት ወቅት ነው፡፡

የምክር ቤት አባላት በኢትዮጵያ ዘላቂ ሰላምን ለማጽናትና የተጀመረውን አገራዊ ብልጽግና እውን ለማድረግ መንግስት ምን የመፍትሔ አማራጭ አስቀምጧል በሚል ጥያቄ አንሰተዋል፡፡

ጠቅላይ ሚኒስትር ዐቢይ አህመድ (ዶ/ር ) በኢትዮጵያ ዘላቂ ሰላምን ለማጽናት በተደረገው ሁለንተናዊ ጥረት አሁን ላይ መሻሻል እየታየ መሆኑን ገልጸው፤ ለአብነትም የብሔር እና የእርስ በርስ ግጭቶች መቀነሳቸውን አስገንዝበዋል፡፡

ኢትዮጵያ ሉዓላዊነቷን ለማስከበር እና ሰላሟን ለማጽናት በአስተማማኝ ቁመና ላይ እንደምትገኝ የገለጹት ጠቅላይ ሚኒሰትሩ ፤ በታሪካዊ ጠላቶች ትዕዛዝ ሰጭነት የታጠቁ ሀይሎች እዚህም እዚያም ዓላማ የሌለው ግጭት ቢፈጥሩም የማይሳካላቸው እንደሆነ አስረድተዋል፡፡

የመንግስት እና የሀዝቡ ትስስር እያደገ በመጣ ቁጥር የኢትዮጵያ ተግዳሮቶች እየቀነሱ ይሄዳሉ፤ ይበልጥ ሰላምና መረጋጋት ይፈጠራል ያሉት ጠቅላይ ሚኒስትር ዶክተር ዐቢይ የታጠቁ ሀይሎች የሰላም አማራጭ እንዲቀበሉ የሚሰራው ስራ ተስፋ ሰጪ ውጤት እያመጣ እንደሆነም ተናግረዋል፡፡

በተመሳሳይም ጠቅላይ ሚኒስትሩ በትግራይ ክልል ዘላቂ ሰላምን ለማስፈን ጊዜያዊ ክልላዊ መንግስት ከማቋቋም ባሻገር ዘርፈ-ብዙ ተግባራት የተከናወኑ መሆናቸውን ገልጸዋል።

የኢትዮጵያን አንድነትና ሉዓላዊነት አደጋ ውስጥ የሚጥሉ ጥቃቶችን መመከት የሚያስችል ሀይል የተገነባ እንደሆነ የገለፁት ጠቅላይ ሚኒስትሩ፤ ኢትዮጵያውያን ለውጭ ጥቃት የማይንበረከኩ እንደሆኑ ከታሪካቸው መረዳት አንደሚቻል አስገንዝበዋል፡፡

ኢትዮጵያ አትወድቅም፤ የወደቁትንም ታነሳለች ያሉት ጠቅላይ ሚኒስትር ዶክተር ዐቢይ አህመድ፤ የብልጽግና ራዕይና ተልዕኮ ያልገባቸውን አካላት በማንቃት ለሀገራቸው እና ለህዝባቸው እድገት እንዲተጉ መንግስት በትኩረት አንደሚሰራ አስታውቀዋል፡፡

(በተስፋሁን ዋልተንጉስ)

ተጨማሪ መረጃዎችን ለማግኘት፡-

በፌስቡክ http://www.facebook.com/hoprparliament

በዩቲዩብ

https://www.youtube.com/@FDREHOPR

በቴሌግራም

https://t.me/ParlamaNews

በትዊተር

http://twitter.com/fdrehopr

በዌብሳይት

www.hopr.gov.et ይከታተሉ።

የሕዝብ ተወካዮች ምክር የፌዴራል መንግሥትን የ2019 በጀት 2.3 ትሪሊዮን ብር አድርጎ አፀደቀ

-----------------------

(ዜና ፓርላማ) ሰኔ 30፣ 2018 ዓ.ም፤ የኢፌዴሪ የሕዝብ ተወካዮች ምክር ቤት ባካሄደው 30ኛ መደበኛ ስብሰባው የ2019 በጀትን በሙሉ ድምፅ አፅድቋል።

ምክር ቤቱ የ2019 በጀት ዓመት የፌደራል መንግስት ረቂቅ በጀት ላይ ከተወያየ በኋላ የቀረበውን የ2.339 ትሪሊዮን ብር በጀት በአዋጅ ቁጥር 1437/2018 አድርጎ በሙሉ ድምፅ አፅድቋል።

በህዝብ ተወካዮች ምክር ቤት የፕላን፣ በጀትና ፋይናንስ ጉዳዮች ቋሚ ኮሚቴ ሰብሳቢ የተከበሩ አቶ ደሳለኝ ወዳጄ የውሳኔ ሃሳብ እና ሪፖርት አቅርበዋል፡፡

ከተያዘው አጠቃላይ በጀት ውስጥ 1.49 ትሪሊዮን ብሩ ከታክስ ገቢ የሚሰበሰብ ሲሆን፣ ቀሪው የ93.7 ቢሊዮን ብር ከልማት አጋሮች በሚገኝ ብድርና ድጋፍ እንዲሁም 320 ቢሊዮን ብር ከሀገር ውስጥ በሚገኝ ብድር የሚሸፈን መሆኑን ሰብሳቢው አስረድተዋል፡፡

አጠቃላይ የበጀት ጉድለቱ ከጠቅላላው የሀገራዊ ምርት (GDP) ያለው ድርሻ 1.4 በመቶ ብቻ መሆኑ ማክሮ ኢኮኖሚን ለማረጋጋት የተያዘውን የፖሊሲ አቅጣጫ የሚያሳይ መሆኑም የተከበሩ አቶ ደሳለኝ ወዳጄ ገልጸዋል፡፡

በበጀት ድልድሉ 30 በመቶ የሚሆነው ከፍተኛው ድርሻ ለትምህርት፣ ለመንገድ፣ ለጤና፣ ለግብርና፣ ለኃይል አቅርቦት ማስፋፊያ እና ለከተማ ልማት የተመደበ ሲሆን፣ ለክልሎች የበጀት ድጋፍ 187.3 ቢሊዮን ብር ወይም 15.1 በመቶ ተመድቧል።

ይህም ከባለፈው ዓመት ጋር ሲነጻጸር የ28.4 ቢሊዮን ብር ወይም 17.8 በመቶ ጭማሪ እንደሚያሳይ ተመላክቷ።

የምክር ቤት አባላት በበኩላቸው፤ ባለበጀት መስሪያ ቤቶች የሚመደብላቸውን በጀት በላቀ ውጤታማነት እና ለታለመለት ዓላማ በማዋል በኃላፊነት ስሜት ሊፈጽሙ እንደሚገባ አሳስበዋል፡፡

የሚመደበውን በጀት ለታለመለት ዓላማ መዋሉን የክትትል እና የቁጥጥር ስራዎችን ማጠናከር እንደሚገባ የምክር ቤት አባላት አይይዘው አስገንዝበዋል፡፡

(በመኩሪያ ፈንታ)

ተጨማሪ መረጃዎችን ለማግኘት፡-

በፌስቡክ http://www.facebook.com/hoprparliament

በዩቲዩብ

https://www.youtube.com/@FDREHOPR

በቴሌግራም

https://t.me/ParlamaNews

በትዊተር

http://twitter.com/fdrehopr

በዌብሳይት

www.hopr.gov.et ይከታተሉ።

የፌዴራል የስፖርት ልማት እና አስተዳደር አዋጅ በሙሉ ድምፅ ጸደቀ

*********************

የሕዝብ ተወካዮች ምክር ቤት ዛሬ ባካሄደው 15ኛ መደበኛ ስብሰባ፣ የስፖርት ዘርፍ ላይ መሠረታዊ ለውጥ ያመጣል ተብሎ የታመነበትን የፌዴራል የስፖርት ልማት እና አስተዳደር ረቂቅ አዋጅ መርምሮ አጽድቋል።

አዲሱ አዋጅ ቁጥር 1413/2018 በስፖርቱ ዘርፍ አካታች፣ ዘመናዊና ግልጽነት ያለው የአሰራር ሥርዓት ለመዘርጋት ምቹ መደላድል የሚፈጥር ሲሆን፣ በዘርፉ የሚታዩ የአሰራርና የመልካም አስተዳደር ችግሮችን በዘላቂነት ለመፍታት ታላቅ ፋይዳ እንዳለው ተገልጿል።

አዋጁ የስፖርት መሠረተ ልማቶችንና ማሰልጠኛ ተቋማትን ከማስፋፋት ባለፈ፣ የስፖርት ግብዓት አምራቾች እንዲበረታቱና ዘርፉ ለሀገር ኢኮኖሚ የራሱን ድርሻ እንዲያበረክት ያደርጋል።

በተጨማሪም ማህበራዊ ትስስርን በማጎልበት፣ ዲፕሎማሲያዊ ግንኙነትን በማጠናከር እና ስፖርት ነክ ወንጀሎችን በመከላከል ረገድ ጉልህ ሚና እንደሚጫወት በምክር ቤቱ የጤና፣ ማህበራዊ ልማት፣ ባህልና ስፖርት ጉዳዮች ቋሚ ኮሚቴ ሰብሳቢ ወርቀሰሙ ማሞ አብራርተዋል።

የባህልና ስፖርት ሚኒስትር ወ/ሮ ሸዊት ሻንካ በሰጡት ማብራሪያ፣ ስፖርት የኢትዮጵያውያን የኩራት ምንጭ እንዲሆን ዘርፉን የያዙ ማነቆዎችን በአሰራርና በስርዓት መፍታት የግድ እንደሚል ጠቁመዋል።

አዋጁ ከዘርፉ ማግኘት ያለባትን ጥቅም እንድታገኝ በማድረግ ረገድ መሠረታዊ ለውጥ እንደሚያመጣ ሚኒስትሯ ገልጸዋል።

የምክር ቤቱ አባላትም የአዋጁን አስፈላጊነት በማመንና አፈጻጸሙ ላይ ትኩረት እንዲደረግ በማሳሰብ አዋጁን በሙሉ ድምፅ ማጽደቁን ከሕዝብ ተወካዮች ምክር ቤት የተገኘው መረጃ ያመለክታል።

ሚያዝያ 13/ 2018

የሴኩዩሪቲ አገልግሎት ክፍያ አካትቶ የተሻሻለው የኢትዮጵያ አቭየሽን ሴኩሪቲ አዋጅ ፀደቀ።

የህዝብ እንደራሴዎች ምክር ቤት ዛሬ ባካሄደው መደበኛ ስብሰባው የኢትዮጵያ አየር መንገድ ለሚሰጠው የአቭየሽን አገልግሎት ከተገልጋዮች ክፍያ መስብሰብ የሚያስችለውን አዋጅ በአብላጫ ድምፅ አፅድቋል።

በአየር ትራንስፖርት ስርዓቱ የሚቃጡ የሕገ ወጥ ጣልቃ ገብ ድርጊቶች፣ ባህሪያትና የአፈፃፀም ስልት ከጊዜ ወደ ጊዜ እያደገና እየተወሳሰበ በመምጣቱ፤ ነባሩ አዋጅ ከሃያ ዓመታት በላይ ሳይሻሻል የቆየ በመሆኑ፤ ዘመን ያመጣቸውን ውስብስብ ህገ ወጥ ጣልቃ ገብ ድርጊቶችን ለመቆጣጠር የሚያስችል እንዲሁም ወቅቱን የዋጀ የህግ ማዕቀፍ መደንገግ የሚያስፈልግ በመሆኑ አዋጁን ማሻሻል እንዳስፈለገ ተነግሯል።

የኢትዮጵያ አየር መንገድ ግሩፕ የዓለም አቀፍ ሲቪል አቭዬሽን ድርጅት ከራሱ መንገደኞች፣ ከሌሎች ኦፕሬተሮች እና በኤርፖርት ውስጥ የአቪዬሽን ሴኪዩሪቲ አገልግሎት ከሚያገኙ ማናቸውም አካላት የአገልግሎት ክፍያ በመሰብሰብ ለብሔራዊ መረጃና ደህንነት አገልግሎት ገቢ እንዲያደርግ በአዋጁ ተደንግጓል።

ከአገልግሎት ክፍያ የሚሰበሰበው ገቢ ለኤርፖርት የሴኩዩሪቲ ቴክኖሎጂ ግዢ፣ ለአቭዬሽን ሴኩዩሪቲ የፀጥታ አካላት ሥልጠናና አቅም ግንባታ፣ ለአነፍናፊ ውሻ ግዥና ሥልጠና፣ ለጥገናና ማስፋፊያ እንዲሁም አሠራርን ለማዘመን የሚውል መሆኑም በአዋጁ ተካትቷል።

ምንታምር ፀጋው

ምክር ቤቱ የባለብዙ ተዋንያን የግብርና ኤክስቴንሽን አገልግሎትና አስተዳደር ረቂቅ አዋጅን መርምሮ አፀደቀ

----------------------

(ዜና ፓርላማ) መጋቢት 29 ፣ 2018 ዓ.ም፤ የሕዝብ ተወካዮች ምክር ቤት በ14ኛ መደበኛ ስብሰባው የባለብዙ ተዋንያን የግብርና ኤክስቴንሽን አገልግሎትና አስተዳደር ረቂቅ አዋጅን መርምሮ አጽድቋል፡፡

በሕዝብ ተወካዮች ምክር ቤት የግብርና ጉዳዮች ቋሚ ኮሚቴ ሰብሳቢ የተከበሩ አቶ ሰለሞን ላሌ ሪፖርት እና የውሳኔ ሀሳብ አቅርበዋል፡፡

ረቂቅ አዋጁ በመንግስት ብቻ የሚሰጠው የግብርና ኤክስቴንሽን አገልግሎት በቂ ባለመሆኑ ወቅቱ የሚጠይቀውን የባለብዙ ተዋንያን የግብርና ኤክስቴንሽን አገልግሎት ሥርዓት እንዲዘረጋ ምቹ መደላድል እንደሚፈጥር ሰብሳቢው አመላክተዋል፡፡

በዲጂታል ግብርና ኤክስቴንሽን የሚያማክሩ እና የመረጃ ቅብብሎሽ አገልግሎት የሚሰጡ የግል ባለሀብቶች ፣መንግስታዊ ያልሆኑ እና የሆኑ ድርጅቶች እየታዩ በመሆኑ በግብርና ኤክስቴንሽን ውስጥ አገልግሎት እንዲሰጡ የሚያስችል ረቂቅ አዋጅ መሆኑን የተከበሩ አቶ ሰለሞን ላሌ አያይዘው አስገንዝበዋል፡፡

የግብርና ኤክስቴንሽን አገልግሎት አሰጣጡ ጥራትና ፍትሃዊነት ቁጥጥር ትኩረት የሚሻ በመሆኑ አገልግሎት የሚሰጠው በተመዘገበና የብቃት ማረጋገጫ ባገኘ አገልግሎት አቅራቢ መሆን እንደሚኖርበት አዋጁ የአሰራር ሥርዓት እንዳስቀመጠ ጠቁመዋል፡፡

የግብርና ኤክስቴንሽን መሰረት ልማት ዝርጋታዎችን ማዘመን በመንግስት ላይ ብቻ በመውደቁ በሚጠበቀው ደረጃ እርካታ ያልተገኘበትን የተጠቃሚዎች ፍላጎት ምላሽ ለመስጠት የግብርና ኤክስቴንሽን ፈንድ ለማቋቋምና ፍላጎት ለመቅረፍ ረቂቅ አዋጁ እንዳካተተ ሰብሳቢው አንስተዋል፡፡

በግብርና ባለሙያዎች ብቻ ይሰጥ የነበረው የግብርና ኤክስቴንሽን አገልግሎት አሁን ላይ የምርት መጠንና ምርታማነትን ለማሳደግ በቂ ምላሽ ባለመስጠቱ ይህንን ችግር ለመፍታት አዳዲስ ቴክኖሎጂዎችን በመጠቀም የግብርና ኤክስቴንሽን አገልግሎቱን ለማሻሻልና ለማዘመን ረቂቅ አዋጁ አስፈላጊ ነው ብለዋል፡፡

የሀገራችን ኢኮኖሚ በግብርና ላይ የተመሰረተ መሆኑን የጠቀሱት አቶ ሰለሞን ላሌ፣ በዘርፉ ምርትን በብዛት፣ በጥራትና በቀጣይነት ለማሳደግ የግብርና ኤክስቴንሽን ከፍተኛ ሚና እንዳለው ገልጸዋል፡፡

የምክር ቤት አባላት በበኩላቸው፣ ከግብርና ምርምር የሚገኙና ከውጭ የሚመጡ ቴክኖሎጂዎችን የግብርና ባለሙያው ለአርሶ አደሮች በተግባር ማሳ ላይ እያሳዩና እያስተማሩ አገልግሎት መስጠት እንዳለባቸው አስተያየት ሰጥተዋል፡፡

የምክር ቤት አባላቱ አያይዘውም የግብርና ኤክስቴንሽን ተደራሽነት ከ36% በላይ አለማለፉን ጠቁመው፣ ረቂቅ አዋጁ ይህንን ክፍተት እንደሚሞላ ገልጸዋል፡፡

ረቂቅ አዋጁ መንግስታዊ ያልሆኑ የአገልግሎት ተዋንያን ህጋዊነትን በጠበቀ መልኩ፣ ተጠያቂነት በሰፈነበት እና ጥራቱ በጠበቀ ሁኔታ መንግስትን እና አርሶ አደሩን በመደገፍ የግብርና ልማቱን በሚገባ እንደሚያሳልጥ ጠቁመዋል።

በመጨረሻም ምክር ቤቱ በረቂቅ አዋጁ ላይ ሰፊ ውይይት ካደረገ በኋላ፣ የባለብዙ ተዋንያን የግብርና ኤክስቴንሽን አገልግሎትና አስተዳደር ረቂቅ አዋጅን፣ አዋጅ ቁጥር 1411/2018 ሆኖ በሙሉ ድምጽ አጽድቆታል፡፡

(በ አገሪቱ ጌቴ)

ተጨማሪ መረጃዎችን ለማግኘት፡-

በፌስቡክ http://www.facebook.com/hoprparliament

በዩቲዩብ

https://www.youtube.com/@FDREHOPR

በቴሌግራም

https://t.me/ParlamaNews

በትዊተር

http://twitter.com/fdrehopr

በዌብሳይት

www.hopr.gov.et ይከታተሉ።