የስፖርቱ ዘርፍ ለሀገር ኢኮኖሚና ለትውልድ ቅብብሎሽ ያለውን አበርክቶ ለማሳደግ በህግና ስርዓት ሊመራ እንደሚገባ ተገለፀ

የስፖርቱ ዘርፍ ለሀገር ኢኮኖሚና ለትውልድ ቅብብሎሽ ያለውን አበርክቶ ለማሳደግ በህግና ስርአት ሊመራ እንደሚገባ በሕዝብ ተወካዮች ምክር ቤት የጤና፣ ማህበራዊ ልማት ባህልና ስፖርት ጉዳዮች ቋሚ ኮሚቴ ገልጿል።

‎‎ቋሚ ኮሚቴው ይህንን የገለጸው የፌዴራል የስፖርት ልማትና አስተዳደር ረቂቅ አዋጅን አስመልክቶ ከባህልና ስፖርት ሚኒስቴርና ከተጠሪ ተቋማት ጋር ውይይት ባደረበት ወቅት ነው።

‎‎የቋሚ ኮሚቴው ሰብሳቢ የተከበሩ ወ/ሮ ወርቀሰሙ ማሞ ረቂቅ አዋጁ በሀገሪቱ ያለውን የተተኪ ስፖርተኞች ብቃት፣ ንቃትና ተወዳዳሪነት ለማሳደግ እንዲሁም የመልካም አስተዳደር ችግሮችንና ብልሹ አሰራሮችን ሊያስወግድ በሚችል መልኩ በህግና ስርዓት ለመምራት የሚያስችል እንደሆነ ገልፀዋል።

‎‎በስፖርቱ ላይ የሚታዩ ችግሮችን በመለየት መፍትሔ ለመፈለግ ያስችል ዘንድ የስፖርት አካዳሚን ጨምሮ የዘርፉ ባለሙያዎች የተሳተፉበት ምክክር ጥናት መደረጉን ገልፀው፣ በጥናቱ ለተገኙ ግኝቶች ምላሽ በሚሰጥ መልኩ ረቂቅ አዋጁ መዘጋጀቱን አስረድተዋል፡፡

‎ ‎ስፖርት ኢኮኖሚን፣ ማህበራዊ ግንኙነትን እና ዲፕሎማሲን ለማጠናከር ከፍተኛ ሚና ስለሚኖረው፣ ኢትዮጵያ ያላትን አለም ዓቀፋዊና አህጉራዊ ትስስር ለማሳደግ እንዲሁም ስነ-ምግባርና ጨዋነት የተላበሰ ትውልድ ለማፍራት የተዘጋጀው ረቂቅ አዋጅ የጎላ ፋይዳ እንደሚኖረው አመላክተዋል።

‎‎የባህልና ስፖርት ሚኒስቴር ሚኒስትር ክብርት ሸዊት ሸንካ ሀገሪቱ ከዘርፉ ማግኘት ያለባትን ጥቅም ማግኘት እንድትችልም ሆነ ኢትዮጵያን በአለም አደባባይ ከፍ የሚያደረጉ ስፖርተኞችን ለመፍጠር የአሰራር ስርዓት ዘርግቶ ስፖርቱ በተገቢው መንገድ መምራት አስፈላጊ ነው ብለዋል።

‎‎ስፖርት ለብዙ ዜጎች የስራ ዕድል የሚፈጥር ኢንዱስትሪ ማድረግ እንደሚያስፈልግ የገለጹት ሚኒስትሯ፣ ረቂቅ አዋጁ ዘርፉን በህግና በአሰራር መምራት የሚያስችል እንደሆነ አንስተው በስፖርት ልማት ላይ የግል ባለሃብቶችን ተሳትፎ በማጉላት የስፖርት ንግድን ማጠናከር እንደሚገባም ገልፀዋል።