የምክር ቤቱ ጉዳዮች አስተባባሪ ኮሚቴ በአምስት ዓመት ስትራቴጂው ላይ ተወያየ

-----------------

(ዜና ፓርላማ ) ጥቅምት 25 ቀን፣ 2019 ዓ.ም.፤ የኢፌዴሪ የሕዝብ ተወካዮች ምክር ቤት አፈ ጉባዔ የተከበሩ አህመድ ሽዴ በምክር ቤቱ የአምስት ዓመት ስትራቴጂያዊ ዕቅድ ላይ ከምክር ቤቱ ጉዳዮች አስተባባሪ ኮሚቴ አባላት ጋር ተወያዩ።

አፈ ጉባዔው እንደገለጹት፣ ምክር ቤቱ ታላቁን የመደመር ስትራቴጂ ከምክር ቤታዊ ተልዕኮው ጋር በማጣጣም ዕምቅ ሀገራዊ አቅምን በተቋማዊ ሥርዓት ለማሳደግና ለሁለንተናዊ ሥልጣኔ ለማበርከት ይሠራል።

ለዚህም ሀገራዊ አንድነትን የሚያጠናክሩና ዕድገትን የሚያፋጥኑ ሕጎችን በማውጣት፣ የሕዝብ ሀብት አጠቃቀምን ከሀገራዊ ቅድሚያዎች ጋር በማጣጣም እና ተቋማት ለውጤታቸው ተጠያቂ እንዲሆኑ ውጤት ተኮር ክትትልና ቁጥጥር በማካሄድ ላይ ያተኩራል።

አክለውም፣ ምክር ቤቱ ዜጎችን በውይይትና በመግባባት ለመወከል፣ በፓርላማዊ ዲፕሎማሲ ንቁ ተሳትፎ ለማድረግ እና የኢትዮጵያን ጥቅምና ክብር በዓለም አቀፍ መድረኮች ለማስከበር እንደሚሠራ ገልጸዋል።

የሐሳብ ልዕልናን በማክበርና ስትራቴጂውን ለዜጎች ወደ ሚታይ ውጤት በመቀየር፣ ምክር ቤቱ በሥራ ዘመኑ መጨረሻ በአፍሪካ የፓርላማ ውጤታማነት ተምሳሌት የመሆን ራዕይ እንዳለው ጠቁመዋል።

ለሀገረ መንግሥት ግንባታ አቅም የሚፈጥሩ ማሻሻያዎችን መተግበር፣ ተቋማዊ ሽግግሩን በማስቀጠል ዲጂታል ምክር ቤት መገንባት እና በሰው ሀብት ልማት ለሴቶችና ለወጣቶች ትኩረት መስጠት የዕቅዱ ቁልፍ የሥራ አቅጣጫዎች መሆናቸውንም አስረድተዋል።